عنوان غريب ... بس واقعي .... إذا ماكنتش غني وعندك فلوس فـإنت حالك مثل حال معظم الناس ... متقدرش تعبر عن إللي بتحس بيه ... سواء كان أحساس حلو أو وحش غالبا مبتقدرش تكون على طبيعتك وتطلع الاحساس ده !
لو إنت في الجامعة ولا في شركة ولا في أي مكان وحظك الوحش وقعك في حب واحدة وحظك الوحش كمان إنك كويس وابن ناس كويسين (ناس كويسين هنا معناه ناس محترمين بس ... مفيش فلوس) وحظك الوحش تاني خلاها تاخد بالها منك وتعجب بيك وتحبك ... دلوقتي جت المشكلة لأنك حتعود تحسبها 100 مرة وتلاقي ان الموضوع مقفل في ال 100 مرة دول 200 مرة .. وتبدأ تكتم في نفسك وتهرب تختفي في أي حتة وبتلاقي نفسك مخنوق لأنك مش عارف تقول إنت حاسس بايه. ده مثال بسيط لحاجات تانية كتير مع ناس اكتر.والخلاصة من الحكاية أنك لو عندك أحساس حلو مش حتعرف تعبر عنه ... طيب إيه المشكلة ماهو ده عادي من زمان وال ناس متعودة عليه....
المشكلة دلوقتي أنك تلاقي نفسك مش عارف كمان تعبر عن الأحساس الوحش ... ليه ؟ لأن دي رفاهية أمثالي و أمثالك مايقدروش عليها ... زي إيه ؟ زي الأكتئاب .. تخيل إنك مش قادر تبقى مكتئب ! ..... طبعا مش مصدق ... طيب تعالى
يعني إيه اكتئاب ... يعني إنك تعمل stop لحياتك لفترة صغيرة أو كبيرة يعني متروحش شغلك ... تقفل موبايلك ... تطلع تمشي لوحدك ... تروح الشاليه بتاعك في الساحل في الشتاء ... تطلع على الشقة التانية المقفولة وتقعد هناك ...
أنا عن نفسي ماقدرش أعمل ولا حاجة من دول يعني ماقدرش اكتئب ... أولا مش حتلاقي حتة تانية تروحها غير بيتكم وكمان متقدرش متروحش شغلك لانك معندكش دخل تاني ... وحتقابل كل يوم 100 واحد يقولك مالك ...
أدعي بقى ربنا يكرمك وتبقى غني وتعرف تكتئب :)
